علي بن إبراهيم القري
1338 ـ 1415هـ
(من كنوز المكتبة الشعرية)
هذا موضوع استخرجته من بستان المكتبة الشعرية المثبّتة في هذا المجلس ,
وقد كتبه الزميل المتألق المراقب السابق
(عرجد) ,
وأنا هنا أعيد نشره مستقلا تماشيا مع أسلوب المجلس
(كتبه روح التميمي) .
* * *
هو الشاعر الكبير علي ابراهيم القري بن عيد( رحمه الله ) , علم من أعلام الشعر في مدينة عنيزة ,
ولد رحمه الله في عنيزة عام 1338هـومات والده وهو صغير تعلم القراءة والكتابة في عنيزة ثم انتقل الى مكة المكرمه وتخرج من مدرسة الضباط وتقلب في عدد من الوظائف العسكريه ثم انتقل الى الجمارك ثم تقاعد وعاش بقية ايامه في جده وتوفي فيها رحمه الله ,
(قال روح التميمي : أظنه تُوفي سنة 1416هـ
وسأتأكد من هذا التاريخ لاحقا إن شاء الله) .
(وهنا لاحقا : فقد توفي رحمه في شعبان سنة 1415هـ ,
والمصدر الجزء الثالث من كتاب شعراء عنيزة الشعبيون ,
وديوان الشاعر محمد البراهيم السلمان .. روح التميمي)
يتميز شعره بانه سهل جدا حتى انك تسمع للشعر وتحسبه كلام مثل:-
يابـــو فهد ارسل لنا كروة البيت . . بالبنك والا عن طريق السبيعي
ابيه قبل لايدخل الماء على الزيت . . والا الثقه بي منك شي طبيعي
(قال روح التميمي : ومن أبياته الطريفة الحلوة قوله :
هلا باللي إلى جا ينفتح في خاطري له باب . . ولكن فرحة الجيّة تشين بكرهة الروحه
أنا أحب الجمال اللي عليه من الحيا جلباب . . ولا عندي( ... ... ... ) عشق روحه
وما بين القوسين غير قابل للنشر !)
من قصائده اختار لكم هذه القصيده التي ارسلها لاحد اصدقائه:-
أشهد انك يا ابــــو عبدالله وفي=ما نسيت ولا تناسيت الصحيب
لو بغيت شمس الصداقه تختفي=ترجعـه للشرق من عقب المغيب
وبالقصيـــد اقهرك بمطوع نفي=شاعرٍ جيد وبالمنبر خطيب
ذا وانا من خطـكم زاد شــرفي=صرت أغر اللاش واعظم من كليب
والرجــال شهور تافــي وتهفي=واجد المخطي وهو وده يصيب
المراد الله يسمح ويعفـي=كـل شيٍ اليوم بالله ثم النصيب
لم يطبع له ديوان خاص به الا ان له قصائد نشرت في بعض الكتب منها شعراء عنيزة
رحمه الله
على عنيزة صابني تقل وسواس=ماغير اهذري به ولابيدي حيله
دار لها بقلوبنا مثل الاجراس=تدق مع رقي النفس وتحويله
دار نحبه حب بريام واحساس=وحب الوطن يرجح بحب القبيله
دار بنت مجده بساس على ساس=بجهود اهلها كل جيل بجيله
لما غدت بالمنطقه تقل نبراس=كل يدور له عليها وسيله
والحمد للي بلغن مسقط الراس=وانا على حال من الله جميله
من عقب تك الخلق من قل الاوناس=اليوم كني بالف ليله وليله
مليت صدري من هوى غر الاطعاس=ركزت بالطبق الخيال استخيله
استلحظه عما حوت هاك الارماس=يالله عساهم بالظلال الظليله
والاه عند اذني تقل يضرس اضراس=لولاي اعرفه قلت ماهو حليله
همن بدى يضرب بالاخماس الاسداس=مدري وش اللي جاه واطلع حصيله
اصغيت اباستفهم كلامه ولاباس=كل على معناه ينضح صميله
دنيا مقاسه زاد عن كل مقياس=تخفي كثير امره وتبدي قليله
يادار ياللي بالرجا تقهر الياس=وحبالها في كل شي طويله
مايبس ريقه يوم الارياق يباس=وهذي تعد من المزايا الاصيله
زمت على صدره ظليلات الاغراس=تفرهدن على قود سلسبيله
عد رسين طول الايام رجاس=يعيض عن شط الفرات وقبيله
فيحاء منول باسها يكسر الباس=يوم الحياة بنجد قوه وعيله
واليوم ساد الشرع وارتاحوا الناس=في ظل دولة ناشرين الفضيله
وصلاة مذري بالمخاليق الانفاس=على الذي دعى الانام لسبيله
* * *
وهذه من إضافات الزميل الكريم (طلال) في المكتبة الشعرية , تفاعلا مع ما كتبه عرجد أعلاه :
امريكا دولةٍ توّه بعز الشباب = ما مثلها بالدول لو كان شعبه خليط
الكل ما يغضب الله عندهم كم باب = والفرق بين الرجل و المره شن بسيط
الناس شاقين و اريح ما يكون الكلاب = متمتعات مع الراحة برزقٍ غبيط
و اهل الدعاره من احل الربح و الإكتساب = البنت من بينهم من يد نشيطٍ لنشيط
فيها عماير تسمى ناطحات السحاب = و فيها بيوتٍ تذكرنا الوهط و الوهيط
اما الديانة فمعظمهم من اهل الكتاب = امحنطين اطقوس الكاثوليك اتحنيط
و هم بكل المفاهم من اشر الدواب = و ارقى الدول تكنولوجية و علم تخطيط
حيث إنها دولةٍ له ظفر و مخلب و ناب = في مجلس الأمن مندوبه يشق و يخيط
و الصين و الروس بالتعداد كثر التراب = لكن من اشعة الليزر يحَطون ميط
)